دوكو DATA

هاى افرى بدى
يعنى للجماعه العرب
السلام عليكم

من غير كلام
ولك وعجن وطبيخ ودق
من الاخر
وجع دماخ
انا رجعت اكتب تريقه على تصرفات اصحابى من تانى
يعنى من الاخر كده
قاعده المواضبع الهادفه
فضناها
هنا احنا جايين نهرج
:)

معلش اسمحولى ارجع واكتب
من تانى كتابات ناقضه
لان المره دى كان لازم اكتب
عن حاجه الواحد بقى يلاحظها كتير
بس مظنش حد غلب فيها صاحبها

دوكو DATA

دوكو ده يا جماعه
مش دهان ولا لاكيه
ومفيش من علب ولا اسبريهات
علشان عارف المخ التخين
ده بنى ادم
او يصنف فى بعض المراجع العلميه على ذلك
والعلم عند الله


المهم ندخل على موضوعنا
انا ليه النهارده قررت كده
انى اكتب عن دوكو DATA
لان عنده زلمه كبيره جدا
والزلمه دى عند اللبنانيين يعنى راجل
بس هنا هنعرف ليها معنى جديد
بس لحد ما نعرف ايه معناها
مش عايز حد يفتكر انى قصدى
على زلمه دى القاعده المستديره
:)
القاعده ليها اسم تانى


المهم
الزلمه دى موجوده فى تفكيره
وهى اصعب من الورم اللى فى المخ
لان الورم يمكن ازالته
لكن الزلمه دى صعبه حبتين

طيب تعالوا احكيلكم قصه
صاحبنا ده يا جماعه
ابو العريف مفيش حاجه ميعرفهاش
عامل زى الموساد الاسرائيلى
يقولك انت لابس فانله حمراء
ويقسملك على كده
ويقولك انا عندى DATA تثبت كده
بالرغم من انك متاكد
انك لابس مايوه
علشان انت على البحر
ومن كتر اصراره على الفانله الحمراء
وان الDATA اللى عنده بتثبت كده
هتصدق نفسك انك لابس فانله حمراء فعلا
بس مش شايفها
وهتروح لاصحابك وتقولهم ايه رايكم فى الفانله الحمراء اللى لابسها
طبعا رد فعلهم معروف
هتبدا بتريقه
وهتنتهى بعلقه تكرهك انك تلبس هدوم تانى


صاحبنا ده داخل جروب احدى المشاريع
عيش الناس احلى عيشه
بدون مقدمات
جمع الناس وقالهم انا معايا المشروع
وجاهز متشلوش هم انتم
طبعا الغلابه صدقوه
مر اسبوع اتنين تلاته
وهو عمال يعمل معاهم اجتماعات
ويشرح ليهم ازاى لما الدكتور يسالهم يردوا
مع انهم هما مش عارفين الدكتور هيسالهم عن ايه
لانهم ميعرفوش المشروع معمول فيه ايه
لكن دوكو DATA مخليهم رافعين شعار
مع دوكو DATA كونى مطمئنه 100 بالمائه
المهم صاحبنا قعد يشتغلهم
لحد الاسبوع اللى فات
وهو ما يدعى اسبوع الحسم
لان الاسبوع اللى هيعرفوا اخيرا وبعد طول انتظار
ايه هو المشروع العظيم اللى مجهزه دوكو DATA العظيم
وكانت

المفاجااااااااااااااااااااااه

المشروع عباره عن صفحتين فقط
و لمزيد من التفاصيل
هما مش صفحتين
هما صورتين
واحده عباره عن
صوره لغلايه بتسخن مياه
علشان تعمل شاى
والصوره التانيه للكبايه اللى هيصبوا فيها
الشاى بس للاسف نسى صوره المعلقه
غبى هيضطر يقلب بصباعه والميه سخنه
6 اشخاص هيقف كل واحد فيهم يتكلم
لمده دقيقتين
هيتكلموا عن طريقه عمل الشاى
طبعا انا بتريق
بس اى حد فى هندسه
يعرف ان لما يطلب الدكتور مشروع
عن انتقال الحراره
ويطلبه من اول الترم يعنى من شهرين
معنى كده ان اقل حاجه
ان كل واحد من 6 يعملوا 4 صفحات
مش ال6 يعملوا صفحتين

طيب بذمتك انتوا لو مكان الدكتور
هتعملوا ايه
انا شخصيا هفك الجزام وانتوا استنتجوا الباقى
:)

المهم يقولوا يا دوكو
الكلام ده مش هينفع
الصفحتين دول نازلين من النت
حتى متعملش فيهم تغيير
يرد عليهم يقولهم انا عندى DATA
يا دوكو طيب فين DATA دى
يقولهم متخوفش انا عندى DATA
طيب فين الDATA دى
شاركنا فيها احنا معاك فى المشروع
يرد عليهم برده
متقلقوش انا عندى ...........
-اكمل مكان الفراغات انت-

علشان مطولش اكتر من كده
ولانى انا كمان تعبان
ونفسى انام



نصيحه ليك يا صاحبى
لانك غالى عليا
مش عيب انك لما متعرفش حاجه
تقول معرفش
العيب انك تتكبر وتقول انك تعرفها
الانسان بينزل مننا للدنيا ميعرفش غير صوت امه
واحيانا ما بيعرفوش
وغالبا بينساه بعد ساعه من ولاده
لكن العيب انى اتكبر على العلم
والعيب الاعظم انى ادعى المعرفه
مش كل حاجه تنفع فيها الفهلوه
فى حاجات لازم نديها وقتها
ونسمع فيها للى يعرف
يا صاحبى
انزل من البرج اللى انت فيه للارض بمزاجك
بدل ما تتزق من فوقيه وتكتشف
انك انتهيت خلاص
وبلاش كلمه
انك مفيكش عيب
لان الكمال لله - عز وجل-
فوق قبل ما يفوت الوقت

فووووووووووووووووووق